Preface

Sa tabang nin langit na linalaoman,
manoltolan logod an ipagsasaysay,
magpoon kaidto asin sagkod ngonyan,
mga agi-agi, GACIAS na angkan.

Gabos na magurang sagkod kaapuan,
giromdomon bilang kan mga may buhay,
sirve sindang giya asin mga ilaw,
sa buhay tang ini, sa huri pang aldaw.

Daculang pasabong na ini gibohon,
giromdomon bilang nag-aging panahon,
kun sakali baga gibo bakong toltol,
hipnoan na sana, iyong linalaom.

Tunay na pagmawot na ini mahaman,
na minsan mamogtak sa kapangahasan,
ugali na ini nin may katuyohan,
tuyaon kun sukat kun igwang karatan.

Asin sa giraray haman sa paglaom,
an diit na obra na ipagboboyboy,
an katotoohan iyong sasabihon,
talae nin marhay sakong dadagoson.